معاشی و مالیاتی چیلنجز پر اہم اجلاس کل اسلام آباد میں طلب، وسائل کی تقسیم زیر غورہوگا

ملک کو درپیش معاشی اور مالیاتی چیلنجز کے پیش نظر ایک اعلیٰ سطح کا اہم اجلاس کل اسلام آباد میں طلب کر لیا گیا ہے۔ ذرائع کے مطابق اجلاس میں وزرائے اعلیٰ اور وفاقی حکومت کی معاشی ٹیم شرکت کرے گی۔

ذرائع کا کہنا ہے کہ جیوپولیٹیکل صورتحال اور جنگی حالات کے باعث وفاق کو مالیاتی وسائل کی تقسیم میں مشکلات کا سامنا ہے، جس پر اجلاس میں تفصیلی غور کیا جائے گا۔ وفاقی قابل تقسیم محاصل پول اور مالیاتی اخراجات کے معاملات بھی ایجنڈے میں شامل ہیں۔

اجلاس میں قومی مالیاتی کمیشن ایوارڈ کے فارمولے، وفاق اور صوبوں کے مشترکہ اخراجات پر بھی گفت و شنید ہوگی۔ ذرائع کے مطابق وفاقی حکومت موجودہ حالات کے باعث پیدا ہونے والے مالیاتی اثرات پر بریفنگ دے گی اور دستیاب و درکار وسائل کا جائزہ لیا جائے گا۔

ادھر وزیراعلیٰ مراد علی شاہ اجلاس میں شرکت کے لیے اسلام آباد جائیں گے۔ ذرائع کے مطابق انہوں نے اجلاس سے قبل معاشی ماہرین اور سابق بیوروکریٹس سے مشاورت بھی کی ہے۔