کارکردگی مایوس کن رہی، بھارت ہم سے بہتر کھیلا: ہیڈکوچ مائیک ہیسن

 ٹی ٹوئنٹی ورلڈکپ میں بھارت کے خلاف 61 رنز کی شکست کے بعد پاکستان کی وائٹ بال ٹیم کے ہیڈکوچ مائیک ہیسن نے کہا ہے کہ بھارتی ٹیم نے ہر شعبے میں بہتر کھیل پیش کیا اور پاکستان کو آؤٹ کلاس کردیا۔

پریس کانفرنس میں گفتگو کرتے ہوئے انہوں نے کہا کہ دوسری اننگز میں گیند زیادہ سلپ کررہی تھی جس نے بیٹرز کے لیے مشکلات پیدا کیں۔ ان کا کہنا تھا کہ ایشان کشن نے ذمہ دارانہ اور جارحانہ بیٹنگ کرتے ہوئے ہمارے اسپنرز پر دباؤ ڈالا اور میچ ہم سے دور لے گئے۔

مائیک ہیسن نے کہا کہ بیٹنگ لائن توقعات پر پوری نہیں اتری، ابتدائی وکٹوں کے جلد گرنے سے ٹیم دباؤ میں آگئی اور خاطر خواہ پارٹنرشپ قائم نہ ہوسکی۔ انہوں نے واضح کیا کہ پہلے بولنگ کرنے کا فیصلہ حالات کے مطابق درست تھا۔

ہیڈکوچ کے مطابق اگر ٹیم کو ٹورنامنٹ میں آگے بڑھنا ہے تو کارکردگی میں نمایاں بہتری لانا ہوگی۔ ان کا کہنا تھا کہ “ہم حالیہ مہینوں میں اچھی کرکٹ کھیل رہے تھے مگر اس میچ میں معیار برقرار نہ رکھ سکے۔”