پاکستان اور ترکمانستان کی وزارت خارجہ کے درمیان تعاون کے پروگرام پر دستخط
Web Desk
17 November 2026
نائب وزیراعظم و وزیرِ خارجہ سینیٹر محمد اسحاق ڈار اور ترکمانستان کے نائب چیئرمین کابینہ و وزیرِ خارجہ رشید مریدوف نے ایک اہم پروٹوکول اور دونوں ممالک کی وزارتِ خارجہ کے درمیان 2026 سے 2030 تک دوطرفہ تعاون کے پروگرام پر باضابطہ دستخط کر دیے ہیں۔
دفترِ خارجہ کے ترجمان کی جانب سے جاری بیان کے مطابق اس موقع پر پاکستان کی وزارتِ بین الصوبائی رابطہ اور ترکمانستان کی وزارتِ ثقافت کے درمیان سیاحت کے شعبے میں تعاون کو فروغ دینے سے متعلق ایک مفاہمت کی یادداشت (ایم او یو) پر بھی دستخط کیے گئے۔ ترجمان کا کہنا تھا کہ ان معاہدوں اور دستاویزات سے پاکستان اور ترکمانستان کے درمیان تعلقات کو نئی بلندیوں تک لے جانے کے مشترکہ عزم کی بھرپور عکاسی ہوتی ہے۔
قبل ازیں نائب وزیراعظم سینیٹر محمد اسحاق ڈار نے اسلام آباد میں وزارتِ خارجہ میں ترکمانستان کے ہم منصب رشید مریدوف کے ہمراہ پاکستان اور ترکمانستان کے مشترکہ بین الحکومتی کمیشن (آئی جی سی) کے چھٹے اجلاس کی مشترکہ صدارت کی۔ اجلاس کے دوران دونوں ممالک کے درمیان دوطرفہ تعاون کے تمام پہلوؤں کا تفصیلی جائزہ لیا گیا اور تجارت و سرمایہ کاری، توانائی، زراعت و غذائی تحفظ، ٹرانسپورٹ و مواصلات، صنعت، انفارمیشن ٹیکنالوجی و ٹیلی کمیونیکیشن، تعلیم، صحت، بینکاری و مالیات، سیاحت، کھیل اور ثقافت سمیت مختلف شعبوں میں تعاون کو مزید وسعت دینے کے عملی طریقوں پر تبادلہ خیال کیا گیا۔
مذاکرات کے دوران بجلی کے شعبے میں تعاون، ٹرانزٹ تجارت اور علاقائی روابط کے فروغ کے امکانات بھی زیرِ غور آئے، جبکہ دونوں فریقوں نے کاروباری اداروں کے درمیان براہِ راست روابط، ادارہ جاتی شراکت داری اور عوامی سطح پر تبادلوں کو مزید مضبوط بنانے کی اہمیت پر زور دیا۔ نائب وزیراعظم اسحاق ڈار نے کہا کہ طے پانے والے فیصلوں اور معاہدوں پر مؤثر عمل درآمد یقینی بنانے کے لیے مشترکہ ورکنگ گروپس، اداروں کے درمیان قریبی رابطہ کاری اور پیش رفت کا باقاعدہ جائزہ لینا انتہائی ضروری ہے، تاکہ دونوں برادر ممالک کی دیرینہ دوستی کو ٹھوس معاشی و عملی فوائد میں تبدیل کیا جا سکے۔
اجلاس میں وفاقی وزیر برائے توانائی، وفاقی وزیر برائے تجارت، وفاقی وزیر برائے پیٹرولیم، وزیرِ مملکت برائے وفاقی تعلیم و پیشہ ورانہ تربیت اور وزیرِ مملکت برائے قومی ورثہ و ثقافت کے علاوہ متعلقہ وزارتوں اور محکموں کے اعلیٰ حکام نے بھی شرکت کی۔
علاقائی صورتحال پر گفتگو کرتے ہوئے وزیرِ خارجہ سینیٹر محمد اسحاق ڈار نے اس بات پر زور دیا کہ تمام زیرِ التوا مسائل کے حل اور خطے میں پائیدار امن و استحکام کے قیام کے لیے مذاکرات اور سفارت کاری ہی واحد قابلِ عمل راستہ ہیں۔ ترکمانستان کے وزیرِ خارجہ رشید مریدوف نے علاقائی امن و استحکام کے فروغ کے لیے پاکستان کے تعمیری کردار اور مسلسل سفارتی کوششوں کو بھرپور انداز میں سراہا۔
متعلقہ عنوانات
ابوظبی: روسی ایم ایم اے فائٹر عثمان نورماگومیدوف جیل سے رہا، جرمانے میں 50 فیصد کمی
17 November 2026
فیلڈ مارشل سے برطانوی فوج کے سربراہ کی ملاقات، فوجی تعاون مزید بڑھانے کا عزم
17 November 2026
قیمتی پتھروں کی برآمدات ایک ارب ڈالر تک بڑھانے کا ہدف مقرر کردیا، لیفٹیننٹ جنرل (ر) محمد ظفر اقبال
17 November 2026
چھوٹے انتظامی یونٹس کے حمایتی، کام آئینی فریم ورک میں ہونا چاہیے: حافظ نعیم
17 November 2026
ایران کا بحرین میں امریکی ریڈار سسٹم کو ڈرون حملے سے نشانہ بنانے کا دعویٰ
17 November 2026
مختلف شہروں میں خشک سالی کا شدید خطرہ، ہائی الرٹ جاری
17 November 2026
ملک میں نئے انتظامی یونٹس پر جلد از جلد ریفرنڈم کرایا جائے: فاروق ستار
17 November 2026
آئینی عدالت نے سابقہ ڈی جی نیب سلیم شہزاد پر جاری چارج شیٹ کو کالعدم کر دیا
17 November 2026