سمندری حدود کا دفاع مضبوط، پاک بحریہ میں جدید و منفرد ٹیکنالوجیز سے لیس خیبر کی شمولیت

مادرِ وطن کی سمندری حدود کا دفاع مزید مضبوط ہو گیا ہے اور پاک بحریہ کے بیڑے میں جدید و منفرد ٹیکنالوجیز سے لیس دوسرے ملجم کلاس جہاز “پی این ایس خیبر” کا اضافہ کر دیا گیا ہے۔ پاک فوج کے شعبہ تعلقات عامہ (آئی ایس پی آر) کے مطابق، پی این ایس خیبر کی شمولیت کی پروقار تقریب منعقد ہوئی جس میں امیر البحر ایڈمرل نوید اشرف نے بطور مہمانِ خصوصی شرکت کی۔

تقریب سے خطاب کرتے ہوئے نیول چیف ایڈمرل نوید اشرف نے کہا کہ پاک بحریہ کے یہ جدید پلیٹ فارمز دشمن کے اہم انفراسٹرکچر اور بحری اثاثوں کو مؤثر طریقے سے نشانہ بنانے کی بھرپور صلاحیت رکھتے ہیں۔ انہوں نے اس بات پر زور دیا کہ پاکستان عالمی توانائی کے اہم بحری راستوں پر واقع ہے، جہاں بحری سکیورٹی ہماری اولین ترجیح ہے۔ قومی مفادات کے تحفظ اور تجارتی راستوں کو محفوظ بنانے کے لیے ایک طاقتور بحری قوت وقت کی اہم ضرورت ہے۔

امیر البحر نے تاریخی حوالے دیتے ہوئے بتایا کہ معرکۂ حق کے دوران پاک بحریہ بھارتی طیارہ بردار جہاز “وکرانت” کو غرق کرنے کے لیے مکمل تیار تھی اور آج بھی پاکستان کے بحری مفادات کو چیلنج کرنے والی کسی بھی جارحیت کا بھرپور جواب دیا جائے گا۔ انہوں نے مزید کہا کہ پی این ایس خیبر اور مستقبل میں شامل ہونے والی ہنگور کلاس آبدوزیں ملکی بحری دفاع کے لیے سیسہ پلائی دیوار ثابت ہوں گی۔ نیول چیف نے سمندری حدود کے تحفظ اور خود مختار سمندروں کی حفاظت کے لیے پاک بحریہ کے غیر متزلزل عزم کا اعادہ بھی کیا۔