پاک بحریہ اور پی ایم ایس اے کا بڑا آپریشن؛ اورماڑہ کے ساحل سے لاپتہ نجی کارگو طیارے کا ملبہ تلاش کر لیا گیا

پاک بحریہ اور پاکستان میری ٹائم سیکیورٹی ایجنسی (PMSA) نے ایک انتہائی پیچیدہ اور بڑے سرچ آپریشن کے بعد لاپتہ ہونے والے نجی کمپنی ‘K2 ائیرویز’ کے کارگو طیارے کا ملبہ تلاش کر لیا ہے۔ یہ کامیابی دونوں اداروں کی مشترکہ اور انتھک کوششوں کے نتیجے میں حاصل ہوئی ہے۔

ذرائع کے مطابق، نجی کارگو کمپنی کا طیارہ لاپتہ ہونے کی اطلاع ملتے ہی پاک بحریہ اور پی ایم ایس اے نے سمندر میں ایک وسیع پیمانے پر مشترکہ امدادی آپریشن کا آغاز کیا۔ سمندر کی لہروں اور مشکل حالات کے باوجود یہ آپریشن مسلسل 12 گھنٹے سے زائد وقت تک جاری رہا، جس میں جدید تکنیکی آلات اور بحری جہازوں کا استعمال کیا گیا۔

حکام نے تصدیق کی ہے کہ فضائی اور بحری نگرانی کے بعد بالآخر لاپتہ کارگو طیارے کا ملبہ اورماڑہ کے ساحل سے 53 ناٹیکل مائل جنوب کی جانب گہرے سمندر سے تلاش کر لیا گیا ہے۔ طیارے کے حادثے کی وجوہات اور عملے کے ارکان کے حوالے سے مزید تحقیقات اور امدادی کارروائیاں تاحال جاری ہیں۔