عمان کے قریب ایک اور آئل ٹینکر نامعلوم پروجیکٹائل حملے کی زد میں آگیا

عمان کی ساحلی حدود کے قریب ایک اور آئل ٹینکر نامعلوم پروجیکٹائل (میزائل یا گولے) کے حملے کی زد میں آ گیا ہے۔ برطانیہ کی میری ٹائم ٹریڈ آپریشنز اتھارٹی (یو کے ایم ٹی او) نے اس حملے کی باضابطہ تصدیق کر دی ہے۔ رپورٹ کے مطابق، حملہ جہاز کے دائیں جانب واقع انجن روم کے حصے پر کیا گیا، خوش قسمتی سے حملے کے نتیجے میں جہاز کا تمام عملہ محفوظ رہا اور کسی جانی نقصان کی اطلاع موصول نہیں ہوئی۔ واضح رہے کہ اس سے قبل بھی عمان کے علاقے لیما کے قریب ایک آئل ٹینکر پر حملہ کیا گیا تھا۔ یکے بعد دیگرے ہونے والے ان حملوں پر تشویش کا اظہار کرتے ہوئے عمانی وزارتِ خارجہ نے سمندری قوانین سے متعلق اقوامِ متحدہ کے کنونشن کے تحت اپنی ذمہ داریوں سے مکمل وابستگی کا اعادہ کیا ہے اور تمام فریقین سے اپیل کی ہے کہ وہ آبنائے ہرمز میں بین الاقوامی قوانین کی سختی سے پاسداری کریں۔ عمانی وزارتِ خارجہ کا مزید کہنا ہے کہ خطے اور آبنائے ہرمز میں محفوظ جہاز رانی کی بحالی کے لیے عمان کا غیر جانبدارانہ اور شفاف تعاون مسلسل جاری ہے۔