فیفا ورلڈ کپ 2026: نورا فتیحی کا نیا گانا ریلیز، افتتاحی تقریب میں اسٹیج پر جلوہ بھی دکھائیں گی

فیفا ورلڈ کپ 2026 کے لیے تیار کیے گئے آفیشل میوزک پروجیکٹ کے تحت نورا فتیحی کا نیا گانا “سیئر سیئر” باضابطہ طور پر ریلیز کر دیا گیا ہے، جس نے عالمی سطح پر توجہ حاصل کر لی ہے۔

یہ گانا موسیقی کے عالمی البم کا حصہ ہے، جس میں دنیا بھر کے مختلف ثقافتی پس منظر رکھنے والے فنکار شامل ہیں۔ اس پروجیکٹ میں نورا فتیحی نے موسیقی کے پروڈیوسر سنجے اور فرانسیسی گلوکار ویج ڈریم کے ساتھ اشتراک کیا ہے۔

نورا فتیحی کے مطابق یہ گانا ان کے لیے نہایت خاص ہے، کیونکہ اس میں مختلف ثقافتی رنگوں کو یکجا کرنے کی کوشش کی گئی ہے تاکہ ایک ایسا عالمی انداز تخلیق کیا جا سکے جو منفرد بھی ہو اور جاندار بھی۔

انہوں نے کہا کہ اس پروجیکٹ میں ان کی مراکشی جڑیں، کینیڈین پس منظر اور بھارت سے حاصل ہونے والی محبت کا امتزاج شامل کیا گیا ہے، جو ان کے فنی سفر کا اہم حصہ رہا ہے۔

ان کا کہنا تھا کہ اس گانے کی تیاری میں بھارتی نمائندگی بھی نمایاں رہی ہے، جس میں کوریوگرافی، ڈانسرز اور اسٹائلنگ ٹیم نے اہم کردار ادا کیا۔

نورا فتیحی نے اسے اپنے کیریئر کا ایک غیر معمولی اور خوابوں سے بھرپور لمحہ قرار دیا ہے، جس کے ذریعے وہ مشرقی موسیقی کو عالمی سطح پر متعارف کرانا چاہتی ہیں۔