چائلڈ پورنوگرافی، زبردستی شادیوں اور جرگوں کےرپورٹ میں ہولناک انکشافات

پاکستان میں بچوں کے حقوق کے تحفظ کے لیے قائم قومی کمیشن (NCRC) نے یونیسیف (UNICEF) کے تعاون سے اقوامِ متحدہ کی کمیٹی برائے حقوقِ اطفال کی سفارشات پر مبنی ایک خصوصی دستاویزی رپورٹ جاری کی ہے، جسے ملک بھر کے 37 بچوں پر مشتمل ‘چائلڈ ایڈوائزری پینل’ نے خود تیار کیا ہے۔ رپورٹ میں سنسنی خیز انکشاف کیا گیا ہے کہ زینب الرٹ اور اینٹی ریپ ایکٹ جیسے قوانین کے باوجود تاحال بچوں کا تحفظ ممکن نہیں ہو سکا۔ بچوں نے اسکولوں اور گھروں میں جسمانی تشدد (کارپورل پنشمینٹ) اور انٹرنیٹ پر چائلڈ پورنوگرافی کے بڑھتے ہوئے آن لائن جنسی استحصال پر شدید تشویش کا اظہار کیا ہے۔ رپورٹ میں حکومت پر زور دیا گیا ہے کہ ملک بھر میں لڑکیوں کی شادی کی کم از کم عمر 18 سال مقرر کی جائے، جرگوں اور پنچایتوں کے بچوں سے متعلق فیصلوں پر پابندی لگائی جائے اور اقلیتی لڑکیوں کی زبردستی تبدیلیِ مذہب اور شادیاں رکھی جائیں۔ مزید برآں، سال 2025 کے دوران کشمیر فائرنگ اور مسالک کے مابین تنازعات میں بچوں کی ہلاکتوں، اور “غیرت کے نام پر قتل” کے واقعات پر گہری تشویش کا اظہار کرتے ہوئے وفاقی و صوبائی بجٹ میں بچوں کے تحفظ کے لیے فنڈز بڑھانے اور این سی آر سی کو مکمل خود مختار بنانے کا مطالبہ کیا گیا ہے۔