وزیرِ اعظم پاکستان کی کفایت شعاری مہم کے تحت قومی اسمبلی سیکرٹریٹ کے اخراجات میں نمایاں کمی

اسلام آباد: اسپیکر قومی اسمبلی سردار ایاز صادق کی خصوصی نگرانی میں قومی اسمبلی سیکرٹریٹ نے اخراجات میں نمایاں کمی کرتے ہوئے 47 کروڑ 21 لاکھ روپے سرکاری خزانے میں جمع کرا دیے ہیں۔ اس کے علاوہ، عوامی نمائندوں نے بھی قربانی دیتے ہوئے اپنی تنخواہوں سے 2 کروڑ 10 لاکھ روپے کی کٹوتی کرائی ہے، جو براہِ راست وزیراعظم کے کفایت شعاری فنڈ 2026 میں منتقل کر دیے گئے ہیں۔

اسپیکر نے سیکرٹریٹ کو 2 ارب روپے کی مجموعی بچت کا ہدف دیا ہے، جس کے لیے سخت اقدامات اٹھائے جا رہے ہیں۔ توانائی کے بحران سے نمٹنے کے لیے پارلیمنٹ کی بجلی کی ضروریات اب ‘گرین پارلیمنٹ سولر سسٹم’ سے پوری کی جا رہی ہیں، جبکہ ایندھن بچانے کے لیے 75 فیصد سرکاری گاڑیوں کو گراؤنڈ (بند) کر دیا گیا ہے۔ مزید برآں، دفتری اخراجات کم کرنے کے لیے صرف 200 ملازمین کو فزیکل ڈیوٹی پر مامور کیا گیا ہے، جبکہ دیگر غیر ضروری اخراجات پر بھی پابندی عائد کر دی گئی ہے۔