سٹاک مارکیٹ میں بڑی گراوٹ سے سرمایہ کاروں کے اربوں ڈالر ڈوب گئے: مزمل اسلم

پشاور: وزیرِ خزانہ خیبر پختونخوا مزمل اسلم نے پاکستان اسٹاک ایکسچینج کی حالیہ صورتحال پر شدید تشویش کا اظہار کرتے ہوئے اسے سرمایہ کاروں کے لیے ایک بڑا معاشی المیہ قرار دیا ہے۔ انہوں نے اعداد و شمار جاری کرتے ہوئے بتایا کہ اسٹاک مارکیٹ کا مجموعی سرمایہ (Market Capitalization) 75.5 ارب ڈالر سے کم ہو کر 59 ارب ڈالر پر آ گیا ہے، جس کا مطلب ہے کہ محض چند ہفتوں میں سرمایہ کاروں کے 16.5 ارب ڈالر ڈوب چکے ہیں۔

مزمل اسلم نے نشاندہی کی کہ ایران اسرائیل جنگ سے چھ ہفتے قبل ہی مارکیٹ نے حکومت کا ساتھ چھوڑ دیا تھا۔ ان کے مطابق، 26 جنوری کو اسٹاک انڈیکس 191,000 پوائنٹس پر تھا جو آج گر کر 148,000 پوائنٹس پر آ گیا ہے۔ یہ 43,000 پوائنٹس یعنی تقریباً 22.5 فیصد کی بڑی گراوٹ ہے۔

صوبائی وزیرِ خزانہ نے نقصانات کا موازنہ کرتے ہوئے کہا کہ اگر پاکستانی روپے میں حساب لگایا جائے تو یہ نقصان 4,600 ارب روپے بنتا ہے۔ انہوں نے افسوس کا اظہار کیا کہ اگر پاکستان کے پاس صرف 3,300 ارب روپے ہوتے تو بھاشا، مہمند اور داسو ڈیمز تعمیر ہو سکتے تھے، جبکہ 2100 ارب روپے سے ایک ایم ایل نائن (ML9) جیسا بڑا منصوبہ مکمل کیا جا سکتا تھا۔ انہوں نے خدشہ ظاہر کیا کہ اس گراوٹ سے بے شمار سرمایہ کار مقروض ہو چکے ہوں گے اور بہت سوں کے اثاثے نیلامی کی زد میں آ گئے ہوں گے۔