دیو ہیکل بحری جہاز “ایم ایس سی ڈیلیٹا” کراچی پورٹ پہنچ گیا

دنیا کا دیو ہیکل کنٹینر بحری جہاز “ایم ایس سی ڈینلیٹا” کامیابی کے ساتھ کراچی پورٹ پہنچ کر کے پی ٹی کے مخصوص ٹرمینل پر لنگر انداز ہو گیا ہے۔ کراچی پورٹ ٹرسٹ (KPT) کے ترجمان کے مطابق 400 میٹر طویل اور 67 میٹر چوڑا یہ بحری جہاز 255,288 ڈیڈ ویٹ ٹن کی زبردست گنجائش رکھتا ہے، جو اسے دنیا کے سب سے بڑے تجارتی جہازوں کی فہرست میں شامل کرتا ہے۔ ترجمان کا کہنا ہے کہ اتنے عظیم الجثہ جہاز کی کامیاب آمد کراچی پورٹ کے عالمی معیار کے انفراسٹرکچر اور جدید ترین آپریشنل صلاحیتوں کا واضح ثبوت ہے۔ ادارے کے مطابق ایسے بڑے تجارتی جہازوں کی مسلسل آمد سے نہ صرف بندرگاہ کی مجموعی استعداد میں اضافہ ہو گا بلکہ عالمی شپنگ کمپنیوں کا اعتماد مزید مضبوط ہو گا اور پاکستان کی بین الاقوامی تجارتی سرگرمیوں کو بھی بڑا فروغ ملے گا۔