گنجائش سے زیادہ مسافر بٹھانے پر سخت کریک ڈاؤن کا حکم

موٹروے اور ہائی وے پولیس سنٹرل ریجن نے ڈگی یا سامان رکھنے والی جگہ پر مسافروں کو بٹھانے کے خلاف سخت کریک ڈاؤن کا اعلان کر دیا ہے۔

ترجمان سنٹرل ریجن سید عمران احمد کے مطابق آئی جی سلطان چوہدری کی ہدایات پر زائد کرایہ وصول کرنے والوں کے خلاف مہم جاری ہے، این فائیو سنٹرل سیکٹر ون، ایم سی ون اور ایم سی ٹو زون میں مسافروں کو اضافی کرایہ واپس کروایا جا رہا ہے اور اس سلسلے میں مؤثر کارروائیاں جاری ہیں۔

انہوں نے کہا کہ اوورلوڈنگ کے خلاف سخت ایکشن لیا جائے گا اور بھاری جرمانے عائد کیے جائیں گے جبکہ اوور اسپیڈنگ کے خلاف بھی نئی مقررہ حدِ رفتار پر سختی سے عملدرآمد کیا جا رہا ہے، مسافروں کے ساتھ غیر انسانی سلوک کسی صورت برداشت نہیں کیا جائے گا۔

ترجمان کے مطابق موٹرویز پر کار کے لیے رفتار 100 کلومیٹر فی گھنٹہ اور ہیوی ٹریفک کے لیے 90 کلومیٹر فی گھنٹہ مقرر ہے جبکہ قومی شاہراہوں پر کار کے لیے 80 اور ہیوی ٹریفک کے لیے 65 کلومیٹر فی گھنٹہ حد مقرر کی گئی ہے۔

انہوں نے عوام کو ہدایت کی کہ عید کے دوران سفر میں احتیاط کریں اور حفاظتی اصولوں پر عمل یقینی بنائیں۔