محسن نقوی کی حافظ نعیم الرحمان سے ملاقات، خطے کی موجودہ صورتحال پر گفتگو

وفاقی وزیر داخلہ محسن نقوی کی جماعت اسلامی کے مرکز منصورہ آمد ہوئی جہاں انہوں نے امیر جماعت اسلامی حافظ نعیم الرحمان سے اہم ملاقات کی، جس میں ملک کی مجموعی سیاسی، معاشی اور امن و امان کی صورتحال کے ساتھ ساتھ ایران امریکہ مفاہمت کے بعد پیدا ہونے والی علاقائی صورتحال پر تفصیلی تبادلہ خیال کیا گیا۔

دونوں رہنماؤں نے ایران امریکہ مفاہمت کو خطے کے استحکام و امن کیلئے خوش آئند قرار دیا، جبکہ امیر جماعت اسلامی پاکستان حافظ نعیم الرحمان نے اس تاریخی امن مینو فیسٹو پر پاکستان کے مخلصانہ اور کلیدی سفارتی کردار کو زبردست الفاظ میں سراہا۔

ملاقات کے دوران وفاقی وزیر داخلہ محسن نقوی نے ایران امریکہ مذاکرات کی کامیابی، سفارتی پسِ پردہ کوششوں اور اس حوالے سے حکومتی اقدامات پر امیر جماعت اسلامی پاکستان کو مکمل طور پر اعتماد میں لیا۔

اس اہم بیٹھک میں امیر جماعت اسلامی حافظ نعیم الرحمان نے صومالیہ میں طویل عرصے سے پھنسے ہوئے محصور پاکستانیوں کا معاملہ بھی اٹھایا اور وزیر داخلہ سے پرزور مطالبہ کیا کہ وفاقی حکومت ان پھنسے ہوئے پاکستانیوں کی فوری، باوقار اور بحفاظت وطن واپسی اور بازیابی کیلئے اپنا مؤثر ترین سفارتی کردار ادا کرے۔

ملاقات میں ملکی معیشت کی بہتری، کاروباری برادری کی سہولت اور عام عوام کو مہنگائی سے ریلیف فراہم کرنے پر بھی تفصیلی گفتگو کی گئی۔

امیر جماعت اسلامی حافظ نعیم الرحمان کا کہنا تھا کہ ایران امریکہ مفاہمت کے حوالے سے پاکستان کے تاریخی کردار کو ہمیشہ یاد رکھا جائے گا کیونکہ اس بریک تھرو سے پورے خطے میں پائیدار امن اور تجارتی راستوں کی بحالی کی راہ ہموار ہوئی ہے۔

وفاقی وزیر داخلہ محسن نقوی نے اس موقع پر گفتگو کرتے ہوئے کہا کہ وزیراعظم اور فیلڈ مارشل نے خطے میں امن کے قیام کے لئے ناقابل فراموش اور تاریخی کردار ادا کیا ہے، خطے میں طویل کشیدگی کے خاتمے کا اصل کریڈٹ پاکستان کو جاتا ہے اور ہم اللہ تعالٰی کے حضور سربسجود ہیں کہ ہماری ان حقیر عسکری و سفارتی کاوشوں کو عالمی سطح پر قبولیت اور کامیابی ملی۔