میکسیکو کی جیل میں قیدیوں کے درمیان جھڑپ، بچے سمیت 10افراد ہلاک، 16 زخمی

میکسیکو کی شمال مغربی ریاست سینالوا کی “ایل کاسٹیلو” جیل (El Castillo Prison) میں قیدیوں کے مخالف گروہوں کے درمیان خوفناک پرتشدد جھڑپوں کے نتیجے میں 9 قیدی اور ملاقات کے لیے آیا ہوا ایک نو عمر بچہ ہلاک ہو گئے ہیں۔ عالمی میڈیا کے مطابق پرتشدد تصادم کے دوران مزید 16 قیدی شدید زخمی ہوئے ہیں جنہیں طبی امداد کی فراہم کے لیے ہنگامی بنیادوں پر قریبی ہسپتالوں میں منتقل کر دیا گیا ہے۔

ریاستی سیکرٹریٹ برائے عوامی تحفظ (Secretariat of Public Security) نے واقعے کی تصدیق کرتے ہوئے بتایا کہ سیکیورٹی اداروں اور پولیس فورسز نے موقع پر پہنچ کر فوری آپریشن کیا اور جیل کی انتظامیہ کا کنٹرول دوبارہ حاصل کر لیا ہے۔ حکام کا کہنا ہے کہ ریاستی پراسیکیوٹر کے دفتر کو باضابطہ طور پر واقعے کی تحقیقات اور ذمہ داروں کا تعین کرنے کی ہدایت کر دی گئی ہے۔ احتیاطی تدابیر کے تحت ایل کاسٹیلو جیل میں قیدیوں سے ملاقاتوں کا سلسلہ فی الوقت معطل کر دیا گیا ہے، جبکہ سماجی کارکن متاثرہ خاندانوں سے رابطے میں ہیں تاکہ انہیں مکمل معلومات فراہم کی جا سکیں۔