فتنہ الہندوستان کی کسی سازش کو کامیاب نہیں ہونے دینگے: مولانا عبدالخبیر آزاد

چیئرمین مرکزی رویت ہلال کمیٹی مولانا عبدالخبیر آزاد نے پشاور میں پریس کانفرنس کے دوران کہا کہ فتنہ الہندوستان کی کسی سازش کو پاکستان میں کامیاب نہیں ہونے دیا جائے گا۔ اُن کے مطابق بھارت اپنی شکست کا بدلہ پاکستان میں دہشت گردی کروا کر لے رہا ہے۔

مولانا عبدالخبیر آزاد نے کہا کہ پاکستان اور چین کی دوستی ہمالیہ سے بلند ہے اور پشاور میں چائنہ پاکستان سینٹر قائم کیا گیا ہے۔ انہوں نے وطن عزیز کو اللہ کی طرف سے عطا کردہ تحفہ قرار دیتے ہوئے رمضان المبارک کی آمد کو خوش آئند قرار دیا۔

انہوں نے کہا کہ دشمن بہت چالاک اور عیار ہے، بھارت اور افغانستان آپس میں ملے ہوئے ہیں۔ افواج پاکستان دہشت گردوں کا مقابلہ کر رہی ہیں اور پوری قوم افواج کے ساتھ متحد ہو کر کھڑی ہے۔

چیئرمین رویت ہلال کمیٹی نے مزید کہا کہ اسلام آباد میں عبادت گاہ اور باجوڑ میں پولیس چوکی پر حملے ایسے دہشت گردوں کی کارروائیاں ہیں جو درندہ صفت ہیں۔ انہوں نے قوم سے اپیل کی کہ آئیں مل کر وطن عزیز پاکستان کو مضبوط بنائیں اور دشمن کے کسی ایجنڈے کو کامیاب نہ ہونے دیں۔