کرہ ارض کو آلودگی سے پاک کرنا مشترکہ ذمہ داری ہے: مریم نواز

لاہور: وزیراعلیٰ پنجاب مریم نواز شریف نے عالمی یومِ زیرو ویسٹ کے موقع پر اپنے پیغام میں کرہ ارض کو آلودگی سے پاک کرنے کو ایک مشترکہ قومی و عالمی ذمہ داری قرار دیا ہے۔ انہوں نے ماحولیاتی تحفظ کے لیے عوامی سطح پر کچرے کے خاتمے اور پلاسٹک کے استعمال کو مکمل طور پر ترک کرنے کی اپیل کی۔ مریم نواز نے کہا کہ ان کی حکومت کے فلیگ شپ ‘ستھرا پنجاب پروگرام’ کو عالمی سطح پر پذیرائی مل رہی ہے، جس کے تحت صوبے کے ہر شہر کو زیرو ویسٹ بنانے کا ہدف مقرر کیا گیا ہے۔

وزیراعلیٰ نے انکشاف کیا کہ پنجاب میں کوڑا کرکٹ کے پرانے ڈھیروں کو جدید سائنسی طریقوں سے سرسبز جنگلات اور سولر پارکس میں تبدیل کیا جا رہا ہے۔ انہوں نے بتایا کہ پلاسٹک بیگز پر پابندی کے بعد اب ویسٹ مینجمنٹ کے لیے جدید الیکٹرک وہیکلز اور مشینی نظام متعارف کرایا گیا ہے۔ اس کے علاوہ، کچرے سے توانائی پیدا کرنے کے لیے ‘ویسٹ ٹو ویلیو’ (Waste to Value) منصوبوں کا بھی آغاز کیا جا رہا ہے تاکہ فضلے کو کارآمد بنایا جا سکے۔

زرعی شعبے میں ماحولیاتی بہتری کا ذکر کرتے ہوئے مریم نواز نے کہا کہ کسانوں کو فصلوں کی باقیات (Agricultural Waste) کے انتظام کے لیے سبسڈی پر سپر سیڈرز فراہم کیے جا رہے ہیں تاکہ سموگ اور فضائی آلودگی پر قابو پایا جا سکے۔ انہوں نے واضح کیا کہ پہلی مرتبہ صوبے کی صنعتوں اور فیکٹریوں میں ماحولیاتی قوانین کا سختی سے نفاذ یقینی بنایا جا رہا ہے تاکہ پائیدار ترقی کے اہداف کو پورا کیا جا سکے۔