مریم نواز کا آٹزم میں مبتلا بچوں کی تعلیم و تربیت اور بحالی کے عزم کا اعادہ

لاہور: وزیراعلیٰ پنجاب مریم نواز شریف نے عالمی یومِ آٹزم پر اپنے خصوصی پیغام میں آٹزم میں مبتلا بچوں کو “اللہ کی نعمت” قرار دیتے ہوئے ان کے حقوق کے تحفظ اور معاشرتی شمولیت کے لیے عملی اقدامات کا اعادہ کیا ہے۔ انہوں نے واضح کیا کہ ان کی حکومت کے لیے خصوصی تعلیم محض ایک شعبہ نہیں بلکہ ایک ترجیح ہے، جس کے تحت پنجاب بھر میں 313 اداروں کو بہتر بنایا جا رہا ہے۔

وزیراعلیٰ نے لاہور میں پاکستان کے پہلے “سرکاری آٹزم سکول” اور ریسورس سینٹر کے قیام کو ایک تاریخی کامیابی قرار دیتے ہوئے اپنی ٹیم اور معاون خصوصی ثانیہ عاشق کو خراجِ تحسین پیش کیا۔ اس ادارے میں ‘ارلی آٹزم’ (ابتدائی مرحلے) کی تشخیص کی سہولت بھی فراہم کی گئی ہے۔ مریم نواز شریف کا کہنا تھا کہ یہ صرف ایک سکول نہیں بلکہ ایک “سماجی انقلاب” ہے جو پورے صوبے کے لیے ایک مرکز (Hub) کا کام کرے گا۔

صوبے بھر کے سپیشل طلبہ کے لیے مالی خودمختاری کے حوالے سے “ہمت کارڈ” کا اجرا اور ہر سپیشل ایجوکیشن سینٹر کے لیے ٹرانسپورٹ کی فراہمی جیسے اقدامات کا اعلان بھی کیا گیا۔ وزیراعلیٰ نے بتایا کہ 28 سپیشل ایجوکیشن سکولوں کو ‘سنٹر آف ایکسی لینس’ میں اپ گریڈ کیا جا رہا ہے، جبکہ 27 ڈویژنل پبلک سکولوں میں آٹزم سینٹرز پہلے ہی قائم کیے جا چکے ہیں۔ انہوں نے معاشرے سے اپیل کی کہ ان بچوں کے خلاف ہر قسم کے امتیازی سلوک کا خاتمہ کیا جائے۔