وزیراعلیٰ پنجاب مریم نواز شریف کا کاشتکاروں کیلئے بڑا ریلیف پیکیج

لاہور: وزیراعلیٰ پنجاب مریم نواز شریف نے کاشتکاروں کے لیے ایک جامع ریلیف پیکیج جاری کیا ہے جس کے تحت 25 ایکڑ تک اراضی رکھنے والے کسانوں کو خصوصی مالی معاونت فراہم کی جائے گی۔ عالمی مارکیٹ میں تیل کی قیمتوں میں اضافے اور پاکستان میں پٹرول و ڈیزل مہنگا ہونے کے بعد کسانوں کو درپیش مشکلات کا ادراک کرتے ہوئے، حکومت نے ڈیزل پر بھاری سبسڈی دینے کا فیصلہ کیا ہے۔

وزیراعلیٰ نے اپنے پیغام میں واضح کیا کہ ہر ایک ایکڑ کے لیے 10 لیٹر ڈیزل پر 150 روپے فی لیٹر سبسڈی دی جائے گی، تاکہ کاشتکاروں کی پیداواری لاگت کو کم کیا جا سکے۔ انہوں نے کسانوں کو “معیشت کی ریڑھ کی ہڈی” قرار دیتے ہوئے کہا کہ حکومت اس مشکل وقت میں ان کے ساتھ کھڑی ہے۔ مریم نواز نے مزید کہا کہ اس سبسڈی کے نظام کو مکمل طور پر شفاف بنایا گیا ہے اور وہ خود اس کی نگرانی کر رہی ہیں تاکہ ریلیف براہِ راست حقدار کسان تک پہنچے۔