نوجوان نسل کو فکر اقبال سے روشناس کرانا بے حد ضروری ہے: مریم نواز

وزیراعلیٰ پنجاب مریم نواز شریف نے یومِ اقبالؒ کے موقع پر مفکرِ پاکستان اور شاعرِ مشرق علامہ محمد اقبالؒ کی فکر و بصیرت کو شاندار الفاظ میں خراجِ تحسین پیش کیا ہے۔ اپنے خصوصی پیغام میں وزیراعلیٰ پنجاب نے کہا کہ قیامِ پاکستان کے لیے علامہ اقبالؒ کی فکری خدمات کو کبھی فراموش نہیں کیا جا سکتا کیونکہ انہوں نے اپنے کلام اور دوقومی نظریے کی بیداری سے برصغیر کے مسلمانوں کو آزادی کا شعور دیا۔ مریم نواز شریف نے زور دیا کہ نوجوان نسل کو فکرِ اقبالؒ سے روشناس کرانے کے لیے کلامِ اقبالؒ کو تعلیمی نصاب کا زیادہ سے زیادہ حصہ بنانا ناگزیر ہو چکا ہے۔ ان کا مزید کہنا تھا کہ علامہ اقبالؒ نے خودداری کا درس دے کر قوم کی سمت متعین کی، اور ان کے فلسفے پر عمل پیرا ہو کر ہی پاکستان کو ایک آزادانہ، منصفانہ، اعتدال پسند اور فلاحی ریاست بنایا جا سکتا ہے۔