پنجاب کے تمام شہروں کے اندر چلنے والی پبلک ٹرانسپورٹ فری کرنے کا اعلان

لاہور: وزیراعلیٰ پنجاب مریم نواز شریف نے پٹرولیم قیمتوں میں حالیہ ہوش ربا اضافے کے بعد عوام کو معاشی بوجھ سے بچانے کے لیے انقلابی اقدامات کا اعلان کیا ہے۔ ریلیف پیکج کے تحت پنجاب کے تمام بڑے شہروں میں چلنے والی سرکاری ٹرانسپورٹ بشمول اورنج لائن ٹرین، میٹرو بس سروس، سپیڈو بس اور گرین الیکٹرو بس کا سفر شہریوں کے لیے مکمل طور پر فری کر دیا گیا ہے۔ اب مسافروں کو ان سروسز کے لیے کوئی ٹکٹ نہیں خریدنا پڑے گا۔

وزیراعلیٰ نے کسانوں کے لیے بڑے ریلیف کا اعلان کرتے ہوئے کہا کہ زراعت کے تحفظ کے لیے کاشتکاروں کو فی ایکڑ، فی لیٹر ڈیزل پر 100 روپے سبسڈی نقد رقم کی صورت میں دی جائے گی۔ اس کے علاوہ، متوسط طبقے کے لیے موٹر سائیکل سبسڈی کا بھی اعلان کیا گیا ہے، جس کے تحت ہر رجسٹرڈ بائیک سوار کو 20 لیٹر پیٹرول پر فی لیٹر 100 روپے رعایت ملے گی۔ مریم نواز نے مشکل وقت میں عوام کو تنہا نہ چھوڑنے کا عہد کرتے ہوئے وزیراعظم شہباز شریف کو بھی خراجِ تحسین پیش کیا جنہوں نے بدترین معاشی حالات میں بھی سپلائی برقرار رکھی۔