سعودیہ، پاکستان اور ترکیہ کا اجتماعی دفاع مزید مضبوط بنانے پر اتفاق

سعودی عرب کے دارالحکومت ریاض میں ‘مکہ مشترکہ دفاعی معاہدے’ کے تحت پاکستان، ترکیے اور سعودی عرب کی مسلح افواج کے سربراہان کا ایک اہم عسکری اجلاس منعقد ہوا۔ پاک فوج کے شعبہ تعلقات عامہ (آئی ایس پی آر) کے مطابق جمعہ کے روز ہونے والے اس اعلیٰ سطحی اجلاس میں پاکستان کے چیف آف آرمی اسٹاف فیلڈ مارشل عاصم منیر، ترک چیف آف جنرل اسٹاف جنرل سلجوق اور سعودی چیف آف جنرل اسٹاف نے شرکت کی، جس میں علاقائی سیکیورٹی صورتحال اور سعودی عرب کو درپیش امن و امان کے چیلنجز پر تفصیلی غور کیا گیا۔

آئی ایس پی آر کے مطابق، اجلاس میں شرکا نے مکہ مکرمہ، شہری آبادیوں اور اقتصادی تنصیبات کو نشانہ بنانے کی مذموم کوششوں کی شدید الفاظ میں مذمت کی اور مملکت کی سلامتی کو یقینی بنانے کے لیے سعودی مسلح افواج کی مستعدی اور پیشہ ورانہ صلاحیتوں کو سراہا۔ بیان میں مزید بتایا گیا کہ اجلاس کے دوران تینوں برادر ممالک کی مسلح افواج کے درمیان عسکری رابطہ کاری اور دفاعی صلاحیتوں کو باہم مربوط بنانے کے عملی طریقہ کار پر تبادلہ خیال کیا گیا۔ عسکری قیادت نے تینوں ممالک کے عوام اور افواج کے درمیان قائم تاریخی تعلقات اور باہمی اعتماد کی فضائی کو بھی سراہا۔