پی آئی اے کو منافع بخش بنانا اولین ترجیح، عارف حبیب

معروف کاروباری شخصیت عارف حبیب نے کہا ہے کہ پاکستان انٹرنیشنل ایئرلائن (پی آئی اے) کو ایک بار پھر منافع بخش ایئرلائن بنانا ان کی اولین ترجیح ہے، جبکہ ادارے کے ملازمین کو مکمل تحفظ فراہم کیا جائے گا۔

میڈیا سے گفتگو کرتے ہوئے عارف حبیب کا کہنا تھا کہ پی آئی اے ماضی میں اپنے ملازمین کی بدولت دنیا کی نمبر دو کامیاب ایئرلائن رہی ہے۔ انہوں نے واضح پیغام دیا کہ ملازمین کی ملازمت کا مستقبل کارکردگی سے مشروط ہوگا، جو بہتر کارکردگی دکھائے گا وہی پی آئی اے کا حصہ رہے گا۔

انہوں نے کہا کہ معاہدے کے تحت پی آئی اے کا نام تبدیل نہیں کیا جا سکتا۔ ان کا کہنا تھا کہ ایک کروڑ 40 لاکھ پاکستانی بیرونِ ملک مقیم ہیں جبکہ اوورسیز پاکستانیوں اور پاکستان میں موجود ان کے اہلِ خانہ کی مجموعی تعداد 7 کروڑ سے زائد بنتی ہے، جو ایئرلائن سروسز استعمال کرتے ہیں۔

عارف حبیب نے کہا کہ کوشش ہوگی کہ پاکستانی شہری سفر کیلئے پی آئی اے کو ترجیح دیں، جبکہ حج اور عمرہ آپریشن میں بھی پی آئی اے کو خصوصی اہمیت حاصل ہے۔

انہوں نے مزید کہا کہ نیا ناظم آباد کی طرح پی آئی اے میں بھی کھیلوں کے فروغ کو ترجیح دی جائے گی، تاہم ادارے میں کھیلوں کی مکمل بحالی میں وقت لگے گا۔ پی سی بی کی جانب سے نیا ناظم آباد کو اسکول کرکٹ کیلئے منتخب کرنا خوش آئند ہے۔

ان کا کہنا تھا کہ نیا ناظم آباد میں کرکٹ، بیڈمنٹن، سوئمنگ، ٹیبل ٹینس، فٹبال سمیت دیگر کھیلوں کی جدید سہولیات موجود ہیں، جو نوجوانوں کی صلاحیتوں کو نکھارنے میں اہم کردار ادا کر رہی ہیں۔