خیبر پختونخوا میں بارشوں کا سلسلہ جاری، 16 افراد جاں بحق، 40 زخمی

خیبر پختونخوا کے مختلف علاقوں میں بارش کے دوران مکانات کی چھتیں گرنے، آسمانی بجلی اور دیواریں گرنے کے واقعات میں 16 افراد جاں بحق اور 40 سے زائد زخمی ہو گئے۔ بارش کا سلسلہ وقفے وقفے سے جاری ہے۔

ایبٹ آباد میں مکان کی چھت گرنے سے 4 بچوں سمیت 5 افراد جاں بحق ہوئے، بنوں میں دو دن میں 8 افراد ہلاک جبکہ کوہاٹ میں کچے مکان کی چھت گرنے سے 2 بچے ہلاک ہوئے۔ بٹ گرام میں ایک خاتون جاں بحق اور ایک زخمی ہوئی۔

ضلع سوات میں مالم جبہ روڈ سمیت مختلف مقامات پر لینڈ سلائیڈنگ کے باعث ٹریفک متاثر ہے۔ دریائے سوات میں طغیانی کے پیش نظر مینگورہ کے نشیبی علاقوں سے لوگوں کی محفوظ مقامات پر منتقلی شروع کر دی گئی ہے۔

دوسری جانب پنجاب، بلوچستان اور آزادکشمیر میں بھی تیز بارش اور بعض علاقوں میں ژالہ باری ہوئی۔ بلوچستان میں 4 افراد ہلاک اور 7 زخمی ہوئے، شمالی و مشرقی بلوچستان اور کوہ سلیمان رینج میں شدید بارش جاری ہے۔ سیلابی ریلوں کے باعث متعدد شاہراہیں بند ہیں اور بلوچستان و خیبرپختونخوا کا زمینی رابطہ متاثر ہے۔