ضم شدہ اضلاع میں 32 سرکاری ادارے ایریا ڈویلپمنٹ سیکرٹریٹس کے ماتحت کرنے کا فیصلہ

خیبر پختونخوا حکومت نے قبائلی اضلاع کے انتظامی امور کو مزید مؤثر بنانے کے لیے ایک اہم فیصلہ کرتے ہوئے ضم شدہ اضلاع (فاٹا) میں قائم ڈائریکٹوریٹس اور بڑے سرکاری اداروں کے انتظامی امور کو ‘ایریا ڈویلپمنٹ سیکرٹریٹس’ (ADS) کے ماتحت کرنے کا باضابطہ فیصلہ کر لیا ہے۔

گورنر خیبر پختونخوا نے ڈائریکٹوریٹس اور بڑے سرکاری اداروں کے انتظامی کنٹرول اور رپورٹنگ کے اس نئے نظام کی منظوری دے دی ہے، جس کے تحت اب متعلقہ افسران براہِ راست ایریا ڈویلپمنٹ سیکرٹریٹس کے سیکرٹریز کو رپورٹ کریں گے۔ جاری کردہ نوٹیفکیشن کے مطابق اس نئے انتظامی نظام کے نفاذ سے سرکاری ملازمین کی سروس کی حیثیت، سینیارٹی، پنشن اور ان کی دیگر تمام مراعات پر کوئی منفی اثر نہیں پڑے گا، تاہم ایریا ڈویلپمنٹ سیکرٹریٹس اور صوبائی حکومت کے مابین افسران و ملازمین کے تبادلوں کے لیے چیف سیکرٹری خیبر پختونخوا کی پیشگی منظوری لازمی قرار دی گئی ہے۔ نوٹیفکیشن میں یہ بھی واضح کیا گیا ہے کہ ایریا ڈویلپمنٹ سیکرٹریٹس کے ماتحت آنے والے تمام ادارے اپنے موجودہ دفاتر، سرکاری گاڑیاں اور دیگر دفتری سہولیات بدستور استعمال کرتے رہیں گے۔

نئے انتظامی نظام کے تحت مجموعی طور پر 32 سرکاری ڈائریکٹوریٹس اور اہم اداروں کو ایریا ڈویلپمنٹ سیکرٹریٹس کے ماتحت کیا گیا ہے، جن میں آثار قدیمہ، ثقافت و سیاحت، ہائر ایجوکیشن، وائلڈ لائف، محکمہ خوراک، ماحولیات، ریسکیو 1122، اینٹی کرپشن اور دیگر فلاحی و ترقیاتی محکمے شامل ہیں۔ سرکاری اعلامیے کے مطابق یہ نئے انتظامی انتظامات فوری طور پر نافذ العمل ہوں گے اور آئندہ احکامات تک برقرار رہیں گے۔