برہان مظفر وانی کی شہادت کو 10 سال بیت گئے

مقبوضہ کشمیر کی جدوجہدِ آزادی میں نئی روح پھونکنے والے نوجوان کمانڈر برہان مظفر وانی کی شہادت کو 10 سال بیت گئے۔ برہان وانی نے اکتوبر 2010 میں محض 15 سال کی عمر میں بھارتی تسلط کے خلاف آواز اٹھائی اور ڈیجیٹل دور کی اہمیت کو سمجھتے ہوئے سوشل میڈیا کے ذریعے بھارتی پروپیگنڈے کا بھرپور مقابلہ کیا، جس نے تحریکِ آزادی کو ایک نیا اور جدید انداز دیا۔ 8 لاکھ قابض بھارتی فوج کے لیے ڈراؤنا خواب بننے والے اس مجاہدِ آزادی کو 8 جولائی 2016 کو ان کے 2 ساتھیوں سمیت شہید کر دیا گیا تھا، جس کی خبر پھیلتے ہی لاکھوں کشمیری سڑکوں پر نکل آئے۔ خوف اور جبر کے باوجود مزاحمت کی علامت بننے والے برہان وانی اور دیگر ہزاروں کشمیری شہداء کی یہ قربانیاں عوام کے حقِ خودارادیت کے حصول کے لیے تھیں، جن کا عزم آج 10 سال گزرنے کے بعد بھی کشمیریوں کے دلوں میں اسی توانائی کے ساتھ زندہ ہے۔