جماعت اسلامی کی آزاد کشمیر میں حکومت اور عوامی ایکشن کمیٹی کے درمیان ثالثی کی پیشکش

جماعت اسلامی پاکستان نے آزاد کشمیر میں حکومت اور عوامی ایکشن کمیٹی کے درمیان بڑھتی ہوئی کشیدگی کم کرنے کے لیے ثالثی کا کردار ادا کرنے کی پیشکش کردی ہے۔

اسلام آباد میں پریس کانفرنس سے خطاب کرتے ہوئے امیر جماعت اسلامی پاکستان حافظ نعیم الرحمان نے کہا کہ جماعت اسلامی آزاد کشمیر میں دونوں فریقین کے درمیان مذاکرات کے ذریعے مسائل کے حل کے لیے تیار ہے۔ ان کا کہنا تھا کہ تشدد کے ذریعے حکومتی رٹ قائم کرنا کسی بھی صورت مسئلے کا حل نہیں ہو سکتا۔

انہوں نے کہا کہ وہ جلد حکومت اور آزاد کشمیر کی قیادت سے رابطہ کریں گے تاکہ بات چیت کے ذریعے صورتحال کو بہتر بنایا جا سکے۔ ان کے مطابق کشمیر پاکستان کا ہے اور پاکستان کشمیر کا ہے، جبکہ چند عناصر نے کروڑوں عوام کو مشکلات میں مبتلا کر رکھا ہے۔

حافظ نعیم الرحمان نے کہا کہ آزاد کشمیر کے نوجوانوں کو حالات کو سمجھتے ہوئے مذاکرات کی راہ اپنانی چاہیے۔ انہوں نے کہا کہ جماعت اسلامی تمام متعلقہ قیادت سے رابطے میں ہے اور عوام کے مفاد میں ہر ممکن کردار ادا کرنے کے لیے تیار ہے۔

بجٹ پر بات کرتے ہوئے انہوں نے کہا کہ موجودہ بجٹ محض اعداد و شمار کی رد و بدل کا کھیل ہے۔ ان کا کہنا تھا کہ پیٹرولیم لیوی کو آمدنی کا بڑا ذریعہ بنا دیا گیا ہے جسے فوری طور پر ختم کیا جانا چاہیے۔

انہوں نے عدلیہ اور دیگر اداروں کی مراعات پر بھی بات کرتے ہوئے کہا کہ تمام اداروں کو قربانی دینا ہوگی۔ ان کے مطابق ملک کے دفاع کے لیے جو اخراجات ضروری ہیں عوام اس پر تیار ہیں، تاہم غیر ضروری مراعات ختم ہونی چاہئیں۔

انہوں نے دعویٰ کیا کہ پی ڈی ایم کی جماعتوں میں کوئی حقیقی اختلاف نہیں بلکہ یہ صرف سیاسی مفادات کے لیے ایک “نورا کشتی” ہے۔ ان کا کہنا تھا کہ پاکستان اس وقت سخت معاشی دباؤ کا شکار ہے اور ملک پر بھاری قرضوں کا بوجھ بڑھتا جا رہا ہے۔