کراچی میں مبینہ پولیس مقابلہ، 2 ڈاکو ہلاک

صوبائی دارالحکومت کے علاقے لیاقت آباد ڈاکخانے کے قریب مبینہ پولیس مقابلے میں 2 ڈاکو ہلاک ہو گئے۔ ایس ایس پی سینٹرل ڈاکٹر عمران کے مطابق، دونوں ڈاکو راہگیر شہری سے لوٹ مار میں مصروف تھے کہ اسی دوران پولیس وہاں پہنچ گئی۔ ملزمان نے پولیس پارٹی کو دیکھتے ہی ان پر اندھا دھند فائرنگ شروع کر دی، جس پر پولیس نے دفاع میں جوابی فائرنگ کی اور دونوں ملزمان موقع پر ہی مارے گئے۔ ڈاکٹر عمران نے مزید تفصیلات بتاتے ہوئے کہا کہ ہلاک ہونے والے دونوں ملزموں کا کریمنل ریکارڈ چیک کیا جا رہا ہے، جبکہ ان کی لاشوں کو ضابطے کی کارروائی اور پوسٹ مارٹم کے لیے ہسپتال منتقل کر دیا گیا ہے۔ ایس ایس پی سینٹرل کا کہنا ہے کہ فرار ہونے والے ملزموں کے دیگر ساتھیوں کی گرفتاری کے لیے بھی سرچ آپریشن شروع کر دیا گیا ہے اور انہیں جلد حراست میں لے لیا جائے گا۔