ہمیں بچت کا سبق دیا جاتا ہے مریم نواز کے لئے گیارہ ارب روپے کا جہاز خرید لیا جاتا ہے,جنید اکبر خان

قومی اسمبلی کے اجلاس میں اپوزیشن رکن جنید اکبر خان نے حکومت کی معاشی پالیسیوں اور شاہ خرچیوں کو کڑی تنقید کا نشانہ بناتے ہوئے پیٹرولیم مصنوعات کی قیمتوں میں اضافے پر سنگین سوالات اٹھا دیے۔ ایوان میں خطاب کرتے ہوئے انہوں نے سوال کیا کہ جب ملک میں 28 دن کا پیٹرول پرانے نرخوں پر موجود تھا تو عوام پر نئے ریٹس کا بوجھ کیوں لادا گیا؟ جنید اکبر خان نے حکمرانوں کے طرزِ زندگی پر تنقید کرتے ہوئے دعویٰ کیا کہ ایک طرف عوام کو بچت کا سبق دیا جا رہا ہے اور دوسری طرف وزیراعظم کی تیراکی کے لیے تالاب بجلی سے گرم کیا جاتا ہے، جبکہ مریم نواز کے لیے 11 ارب روپے کا جہاز خریدا جا رہا ہے۔ انہوں نے سخت الفاظ استعمال کرتے ہوئے کہا کہ اس ملک میں “ووٹ دینے والے نہیں بلکہ گننے والے اہم ہیں” اور انہی لوگوں نے ملک پر یہ “گند” مسلط کیا ہے جس کی وجہ سے پاکستان میں پیٹرولیم مصنوعات دنیا کے مقابلے میں مہنگی ترین ہو چکی ہیں۔ ان کا مزید کہنا تھا کہ موجودہ حکمران عوامی خدمت کے بجائے صرف پیسہ بنانے کے ایجنڈے پر کام کر رہے ہیں۔