لیوی کیخلاف جماعت اسلامی کا جلسہ، لاہور میں پولیس نے راستے بند کر دیئے

جماعت اسلامی نے بجلی اور گیس پر عائد لیوی و اضافی ٹیکسوں (بھتے) کے خلاف لاہور میں منعقد ہونے والے جلسے کے لیے آئندہ کے لائحہ عمل کا اعلان کرتے ہوئے پنجاب حکومت پر شدید رکاوٹیں کھڑی کرنے کا الزام عائد کیا ہے۔ ترجمان جماعت اسلامی کے مطابق پولیس نے کارروائی کرتے ہوئے جلسہ گاہ سے اسٹیج، کنٹینر، کرسیاں اور دیگر سامان تحویل میں لے لیا ہے۔ تاہم، ترجمان نے عزم کا اعادہ کیا ہے کہ جماعت اسلامی ہر صورت جلسہ کرے گی اور کارکنان جہاں بھی جمع ہوں گے، وہیں احتجاجی دھرنا اور جلسہ منعقد کیا جائے گا۔

پنجاب پولیس کی جانب سے جلسہ گاہ کے اطراف کنٹینرز لگا کر راستے مسدود کیے جانے کے بعد جماعت اسلامی کی مرکزی قیادت اور کارکنان نے بھیکے وال موڑ پر سڑک بلاک کر کے دھرنا دے دیا۔ موقع پر موجود مرد، خواتین اور بچوں سمیت کارکنوں کی بڑی تعداد نے حکومت کے خلاف شدید نعرہ بازی کی اور رکاوٹیں عبور کرتے ہوئے احتجاج میں شرکت کی۔ قائدین کا کہنا ہے کہ عوامی حقوق اور ناواجب ٹیکسوں کے خلاف یہ تحریک انتظامی رکاوٹوں کے باوجود جاری رہے گی۔