جنگ بندی کے باوجود غزہ میں اسرائیلی حملے جاری، ایک اور فلسطینی شہید، خاتون زخمی

جنگ بندی کے باوجود غزہ میں اسرائیلی حملوں کا سلسلہ جاری رہا، تازہ کارروائی میں ایک فلسطینی شہید جبکہ ایک خاتون زخمی ہوگئیں۔

میڈیا رپورٹس کے مطابق صیہونی فورسز نے خان یونس میں قائم ایک خیمے کو نشانہ بنایا، جس کے نتیجے میں جانی نقصان ہوا۔دوسری جانب رفاہ کراسنگ کو جزوی طور پر بحال کر دیا گیا ہے اور 25 فلسطینی غزہ واپس پہنچ گئے ہیں۔اسرائیل سے فلسطینیوں کی لاشیں اور انسانی باقیات بھی غزہ منتقل کر دی گئی ہیں۔ رپورٹ کے مطابق 54 لاشوں اور 66 ڈبوں میں انسانی باقیات واپس لائی گئی ہیں۔غزہ کی وزارت صحت کا کہنا ہے کہ موصول ہونے والی لاشوں اور باقیات کی فرانزک جانچ اور دستاویزی کارروائی جاری ہے تاکہ شناخت اور ریکارڈ مکمل کیا جا سکے۔خطے میں جاری کشیدگی کے باعث انسانی صورتحال بدستور تشویشناک ہے۔