اسرائیل نے مسجدِ اقصیٰ میں جمعے کی نماز پر پابندی لگا دی

اسرائیلی حکام نے ایران کے ساتھ بڑھتی ہوئی فوجی کشیدگی کو بنیاد بنا کر مقبوضہ بیت المقدس میں واقع قبلہ اول، مسجدِ اقصیٰ میں آج نمازِ جمعہ کی ادائیگی پر پابندی لگا دی ہے۔ اسرائیلی سول ایڈمنسٹریشن کے سربراہ بریگیڈیئر جنرل ہشام ابراہیم نے فوجی پلیٹ فارم ‘المنسق’ کے ذریعے اعلان کیا کہ ایران کی جانب سے ممکنہ جوابی حملوں اور سکیورٹی خدشات کے پیشِ نظر یروشلم کے قدیم شہر (اولڈ سٹی) میں موجود تمام مقدس مقامات بشمول مسجدِ اقصیٰ، مغربی دیوار اور چرچ آف ہولی سیپلکر کو زائرین اور عبادت گزاروں کے لیے بند رکھا جائے گا۔ دوسری جانب مسجدِ اقصیٰ کے سینئر امام شیخ عکرمہ صبری نے اس فیصلے کی شدید مذمت کرتے ہوئے اسے بلاجواز قرار دیا ہے۔ ان کا کہنا ہے کہ اسرائیلی حکام ہر موقع کو مسجدِ اقصیٰ کی بندش کے لیے استعمال کرتے ہیں، جو کہ مذہبی آزادی کی سنگین خلاف ورزی ہے۔