اسلام آباد میں تاجر کا قتل افسوسناک واقعہ، گینگ گرفتار کر لیا: طلال چودھری

اسلام آباد: وفاقی دارالحکومت میں گزشتہ روز کاروباری شخصیت عامر شہزاد کے قتل کے افسوسناک واقعے کے بعد پولیس نے بڑی کامیابی حاصل کرتے ہوئے ملوث گینگ کو گرفتار کر لیا ہے۔ وزیر مملکت برائے داخلہ طلال چوہدری نے آئی جی اسلام آباد کے ہمراہ پریس کانفرنس کرتے ہوئے بتایا کہ تاجر کا قتل ڈکیتی کے دوران مزاحمت پر ہوا، جو کہ ایک بڑا سانحہ ہے۔

طلال چوہدری نے انکشاف کیا کہ گرفتار ہونے والے ‘منصور خان گینگ’ کا تعلق خیبرپختونخوا سے ہے اور اس میں افغان شہری بھی شامل ہیں۔ یہ ایک بین الصوبائی گروہ ہے جو اسلام آباد، پنجاب اور پختونخوا میں سنگین وارداتوں میں ملوث رہا ہے۔ حیران کن طور پر یہ گینگ وارداتوں کے دوران بلٹ پروف جیکٹس کا استعمال کرتا تھا تاکہ پولیس کارروائی سے بچ سکے۔

وزیر مملکت نے مزید کہا کہ اسلام آباد میں امن و امان کی صورتحال دیگر شہروں کے مقابلے میں بہتر ہے اور یہاں پاکستان کا پہلا ‘سمارٹ سٹی’ بنانے جا رہے ہیں تاکہ جدید ٹیکنالوجی کے ذریعے جرائم کا خاتمہ کیا جا سکے۔ انہوں نے واضح کیا کہ چوبیس گھنٹے کے اندر تمام ملزمان کی گرفتاری پولیس کی کارکردگی کا منہ بولتا ثبوت ہے، تاہم تاجر کے قتل پر جتنا دکھ کیا جائے وہ کم ہے۔