اسحاق ڈار کا یورپی یونین کی نائب صدر سے رابطہ، کشیدگی میں کمی پر زور

اسلام آباد: نائب وزیراعظم اور وزیر خارجہ سینیٹر اسحاق ڈار نے یورپی یونین کی اعلیٰ نمائندہ برائے خارجہ امور و نائب صدر کایا کالس (Kaja Kallas) سے ٹیلی فون پر رابطہ کیا ہے، جس میں حالیہ عالمی اور علاقائی سلامتی کی صورتحال پر تفصیلی گفتگو کی گئی۔ دفترِ خارجہ کے ترجمان کے مطابق، دونوں رہنماؤں نے بدلتی ہوئی بین الاقوامی صورتحال اور مشرقِ وسطیٰ سمیت دیگر اہم خطوں میں جاری پیش رفت کا جائزہ لیا۔

سینیٹر اسحاق ڈار نے گفتگو کے دوران کشیدگی میں کمی لانے کی اہمیت کو اجاگر کیا اور واضح کیا کہ عالمی امن اور استحکام کے حصول کے لیے مذاکرات اور سفارت کاری ہی واحد راستہ ہیں۔ انہوں نے زور دیا کہ موجودہ بحرانوں کا حل طاقت کے بجائے پرامن مکالمے کے ذریعے ہی ممکن ہے۔

یورپی یونین کی اعلیٰ نمائندہ کایا کالس اور اسحاق ڈار نے اس بات پر اتفاق کیا کہ بدلتی ہوئی صورتحال کے پیشِ نظر پاکستان اور یورپی یونین کے درمیان قریبی رابطہ برقرار رکھا جائے گا۔ دونوں رہنماؤں نے مشترکہ مشاورت کو جاری رکھنے کے عزم کا اعادہ کیا تاکہ عالمی چیلنجز سے نمٹنے کے لیے ایک مربوط حکمتِ عملی اپنائی جا سکے