اسحاق ڈار کی تاجک وزیراعظم کے عشائیے میں شرکت، مختلف ممالک کی اعلیٰ قیادت سے ملاقاتیں

نائب وزیرِ اعظم و وزیرِ خارجہ سینیٹر محمد اسحاق ڈار نے تاجکستان کے دارالحکومت دوشنبے میں تاجک وزیرِ اعظم قاہر رسول زادہ کی جانب سے دیے گئے پروقار عشائیے میں شرکت کی۔

تاجکستان کے وزیرِ اعظم نے شنگھائی تعاون تنظیم (SCO) کے سربراہانِ حکومت کی کونسل کے اجلاس میں شرکت کرنے والے تمام عالمی وفود کے اعزاز میں اس پرتعیش عشائیے کا اہتمام کیا تھا۔ تقریب میں روس، قازقستان، ازبکستان اور بیلاروس کے وزرائے اعظم کے علاوہ منگولیا کے نائب وزیرِ اعظم اور دیگر رکن و مشاہدہ کار ممالک کی اعلیٰ قیادت نے شرکت کی۔

اس موقع پر نائب وزیرِ اعظم اسحاق ڈار نے دیگر عالمی رہنماؤں سے غیر رسمی گفتگو کی اور باہمی دلچسپی کے امور پر تبادلہ خیال کیا۔ اسحاق ڈار کی اس عشائیے میں شرکت پاکستان اور خطے کے ممالک کے مابین اعلیٰ سطحی سفارتی روابط، تجارتی و دفاعی تعاون اور پائیدار علاقائی شراکت داری کو مزید مستحکم کرنے کے لیے انتہائی اہم سمجھی جا رہی ہے۔