ایران میں امریکی ڈالر کی قیمت 2 لاکھ 50 ہزار تومان کی ریکارڈ سطح پر پہنچ گئی

ایران اور امریکہ کے درمیان جاری مذاکرات کے مستقبل سے متعلق غیر یقینی صورتحال کے باعث ایرانی کرنسی کو تاریخی گراوٹ کا سامنا ہے۔ ایرانی کرنسی مارکیٹ میں امریکی ڈالر کی قیمت تاریخی اور ریکارڈ سطح پر پہنچ گئی ہے، جہاں اوپن مارکیٹ میں ایک امریکی ڈالر 2 لاکھ 50 ہزار تومان میں فروخت ہونے لگا ہے۔ کرنسی میں شدید کمی کے باعث دیگر غیر ملکی کرنسیوں کی قیمتوں میں بھی بے تحاشا اضافہ ریکارڈ کیا گیا ہے، جس میں ایک یورو کی قیمت 2 لاکھ 84 ہزار تومان سے تجاوز کر گئی ہے جبکہ برطانوی پاؤنڈ 3 لاکھ 31 ہزار تومان سے زائد کی سطح پر پہنچ چکا ہے۔

ڈالر اور دیگر بین الاقوامی کرنسیوں کی قدر میں اس مسلسل اور بے قابو اضافے کی وجہ سے ایرانی کاروباری طبقہ شدید مشکلات اور بحران کا شکار ہو چکا ہے۔ معاشی ماہرین کے مطابق امریکی پابندیوں، تجارتی عدم استحکام اور واشنگٹن و تہران کے درمیان جاری سفارتی تناؤ کے باعث ایرانی ریال پر دباؤ مسلسل بڑھ رہا ہے، جس سے ملک میں مہنگائی اور تجارتی نقل و حمل میں پیچیدگیاں مزید بڑھنے کا خدشہ پیدا ہو گیا ہے