امریکی جارحیت بند ہونے تک خطے میں جوابی حملے جاری رہیں گے: ایرانی فوج

ایرانی فوج نے واضح کیا ہے کہ جب تک ایران کے بنیادی ڈھانچے اور ساحلی علاقوں پر امریکی حملے بند نہیں ہوتے، خطے میں ان کی جوابی کارروائیاں بلا تعطل جاری رہیں گی۔ ایرانی سرکاری ٹی وی کے مطابق مسلح افواج کے ترجمان بریگیڈیئر جنرل امیر محمد اکرمینیا نے کہا کہ امریکی فریق کی جانب سے مفاہمتی یادداشت کی خلاف ورزی کے بعد اب دونوں فریق جنگ کے ایک نئے مرحلے میں داخل ہو چکے ہیں۔ انہوں نے بتایا کہ ایران نے جنگ بندی کے دوران اپنی صورتحال اور جنگی صلاحیتوں کو پہلے سے کہیں زیادہ مضبوط بنایا ہے اور مسلح افواج دشمن کی کسی بھی ممکنہ کارروائی اور ہر قسم کے منظرنامے کا مقابلہ کرنے کے لیے مکمل طور پر تیار ہیں۔

ایرانی فوج کے ترجمان کا مزید کہنا تھا کہ ایرانی سیکیورٹی فورسز جلد ایسی نئی حکمتِ عملیاں اپنائیں گی جن سے جارح قوتوں کے لیے جنگ جاری رکھنا ناممکن ہو جائے گا۔ انہوں نے خبردار کیا کہ اگر دشمن نے زمینی راستے سے حملہ کرنے کی غلطی کی تو اس کی کمزوریاں فضائی یا میزائل حملوں کے مقابلے میں کہیں زیادہ ہوں گی، کیونکہ زمینی معرکے میں ایرانی فورسز کی کارکردگی دشمن کو زیادہ سے زیادہ جانی و مالی نقصان پہنچانے میں کہیں زیادہ مؤثر ثابت ہوگی۔