ایرانی مسلح افواج کسی بھی صورتحال کےلیے تیارہیں، دشمنوں کو سخت سزادیں گے، ایران

ایرانی وزارت خارجہ کے ترجمان  اسماعیل بقائی نے واضح کیا ہے کہ ایران کی مسلح افواج کسی بھی صورتحال کیلئے تیار ہیں، ایران کے  دشمنوں کو سخت سزا دی جائے گی۔

اسماعیل بقائی نے سوشل میڈیاپرجاری بیان میں کہاکہ دنیا بربریت اور تسلط کو مسترد کرتی ہے تو ایران کے حق میں آواز بلند کرے، دنیا عملی اقدام کرے اس سے پہلے کہ جارح قوتیں دنیا کو لاقانونیت اور محکومیت کے گڑھے میں دھکیل دیں۔

ترجمان نے کہا کہ امریکااور اسرائیل نے 28 فروری کو ایران پر جو جنگ مسلط کی یہ محض زمین یا وسائل کی خاطر نہیں، یہ جنگ اس وقت اور آنے والے دور میں اچھائی و برائی کے معنی متعین کرےگی۔

ایرانی وزارت خارجہ کے ترجمان کا کہنا تھا پرامن ایرانی قوم پر حملہ کرنے والے اپنے کھیل کیلئے لوگوں کو قتل کرتے ہیں، یہ لوگ خواتین کے اسپورٹس ہال پر میزائل برسا کر ان کی تباہ کن طاقت کو جانچتے ہیں۔

اسماعیل بقائی نے کہاکہ دوسری جانب وہ ایرانی ہیں جو ہر حد تک جاکر بےگناہوں کی جانوں کو بچاتے ہیں، یہ جنگ پیشہ ور جھوٹوں اور اپنے وطن کا دفاع کرنیوالے فاخر لوگوں کے درمیان ہے۔