ہمت ہے تو آبنائے ہرمز میں بحری جہاز بھیج کر دکھائیں، پاسدارانِ انقلاب کا ٹرمپ کو کھلا چیلنج

ایران کی پاسدارانِ انقلاب نے امریکی صدر ڈونلڈ ٹرمپ کو کھلا چیلنج دیتے ہوئے کہا ہے کہ اگر امریکا میں ہمت ہے تو وہ آبنائے ہرمز میں تیل بردار جہازوں کی حفاظت کے لیے اپنے بحری جہاز بھیج کر دکھائے۔

ایرانی سرکاری ذرائع کے مطابق پاسدارانِ انقلاب کے ایک ترجمان نے کہا ہے کہ اگر امریکا اپنے بحری جہاز بھیجنا چاہتا ہے تو وہ آئل ٹینکرز کو آبنائے ہرمز سے بحفاظت گزار کر دکھائے۔

ترجمان کا کہنا تھا کہ ایران اپنی خودمختاری اور سمندری حدود کے تحفظ کے لیے مکمل طور پر تیار ہے۔

ادھر ایرانی فوج نے بھی واضح کیا ہے کہ آبنائے ہرمز اس وقت کھلی ہے، تاہم اگر کوئی امریکی یا اسرائیلی جہاز اس راستے سے گزرنے کی کوشش کرے گا تو اسے نشانہ بنایا جا سکتا ہے۔

یہ بیان ایسے وقت میں سامنے آیا ہے جب امریکی صدر ڈونلڈ ٹرمپ نے منگل کے روز کہا تھا کہ ضرورت پڑنے پر امریکی بحریہ آبنائے ہرمز سے گزرنے والے تیل بردار جہازوں کو سکیورٹی فراہم کر سکتی ہے۔

امریکی صدر کا کہنا تھا کہ اگر حالات کا تقاضا ہوا تو امریکی بحریہ کمرشل جہازوں کے ساتھ آبنائے ہرمز میں موجود ہوگی جبکہ جہازوں کے بیمے کے لیے امریکی مالیاتی اداروں کی مدد بھی فراہم کی جا سکتی ہے۔

واضح رہے کہ آبنائے ہرمز دنیا کے اہم ترین تیل بردار بحری راستوں میں شمار ہوتی ہے کیونکہ مشرقِ وسطیٰ کے کئی تیل پیدا کرنے والے ممالک خصوصاً سعودی عرب، ایران، عراق، کویت، بحرین، قطر اور متحدہ عرب امارات کا برآمدی تیل اسی راستے سے عالمی منڈی تک پہنچتا ہے۔