امریکا ایران جوہری مذاکرات کا پہلا دور، عراقچی نے بات چیت کو مثبت قراردے دیا

امریکا اور ایران کے درمیان جوہری مذاکرات کاپہلادور ختم ہوگیا۔عمان کی میزبانی میں مسقط میں منعقدہ بات چیت میں ایران کی قیادت وزیر خارجہ عباس عراقچی نے کی جب کہ امریکی وفد کی قیادت ٹرمپ کے خصوصی ایلچی برائے مشرق وسطیٰ اسٹیووٹکوف نے کی۔میڈیارپورٹس کے مطابق جمعرات کو مذاکرات کے دو دور ہوئے۔

مذاکرات کے بعد میڈیا سے گفتگو میں ایرانی وزیر خارجہ عباس عراقچی نے کہا کہ بات چیت کی کامیابی کے لیے دھمکیوں یا دباؤ سے اجتناب سب سے ضروری ہے۔ ہم نےمذاکرات میں اپنا یہ نقطہ واضح طور پر اٹھایا اور توقع رکھتے ہیں کہ اس پر عمل کیا جائے تاکہ مذاکرات جاری رہ سکیں۔عباس عراقچی نے کہا کہ مذاکرات مثبت ماحول میں ہوئے اور دونوں طرف کے خیالات اور خدشات کا تبادلہ کیا گیا۔

ایرانی وزیر خارجہ نے یقین دلایا کہ اگر ہم اسی طرح مثبت راستے پر چل سکیں تو جوہری مذاکرات کے حوالے سے ایک مثبت فریم ورک تک پہنچنا ممکن ہے۔وزیر خارجہ عباس عراقچی نے مزید بتایا کہ اگلے مذاکرات کی تاریخ عمان میں اپنے ہم منصب سے مشاورت کے بعد طے کی جائے گی۔