ایران نے پاکستان سمیت ثالثوں کے ذریعے امریکی پیغامات ملنے کی تصدیق کردی

ایران نے پاکستان سمیت مختلف ثالث ممالک کے ذریعے امریکا کے پیغامات موصول ہونے کی تصدیق کر دی ہے۔ ایرانی وزارتِ خارجہ کے ترجمان اسماعیل بقائی نے واضح کیا ہے کہ امریکا کے ساتھ براہِ راست مذاکرات نہیں ہو رہے، تاہم ثالثوں کے ذریعے رابطے جاری ہیں۔

ترجمان کے مطابق ایران نے ایک بار پھر براہِ راست مذاکرات کی خبروں کی تردید کرتے ہوئے کہا کہ پاکستان سمیت دیگر ممالک کے ذریعے پیغامات کا تبادلہ ہوا ہے۔

ادھر برطانوی خبر رساں ادارے نے سینئر ایرانی حکام کے حوالے سے رپورٹ کیا ہے کہ منگل کے روز ثالثوں نے ایران سے رابطہ کیا اور سفارتکاری کے عمل کو جاری رکھنے پر بات چیت کی گئی، تاہم عارضی جنگ بندی کے حوالے سے کوئی باضابطہ گفتگو نہیں ہوئی۔

رپورٹ میں مزید کہا گیا کہ امریکی نائب صدر نے بھی ایرانی تنازع پر پاکستانی ثالثوں سے رابطہ کیا اور ایک سخت پیغام ایران تک پہنچایا گیا۔ ذرائع کے مطابق امریکی صدر نے عندیہ دیا ہے کہ بعض مطالبات کی تکمیل کی صورت میں جنگ بندی پر بات چیت ممکن ہو سکتی ہے، جن میں آبنائے ہرمز کی بحالی بھی شامل ہے۔

دوسری جانب امریکی ذرائع ابلاغ نے دعویٰ کیا ہے کہ ایران اس وقت جنگ کے خاتمے کے لیے سنجیدہ مذاکرات میں شامل ہونے کے لیے تیار نہیں۔