ایرانی وزیر خارجہ کا برطانوی ہم منصب سے رابطہ، خطے کی بڑھتی کشیدگی پر تبادلہ خیال

ایران کے وزیر خارجہ عباس عراقچی اور ان کے برطانوی ہم منصب کے درمیان ٹیلیفونک رابطہ ہوا ہے، جس میں مشرقِ وسطیٰ کی تازہ ترین صورتحال اور خطے میں بڑھتی ہوئی کشیدگی پر تفصیلی تبادلہ خیال کیا گیا۔مشرقِ وسطیٰ میں ایران کے خلاف امریکا اور اسرائیل کی حالیہ فوجی کارروائیوں کے بعد پیدا ہونے والی صورتحال پر بات کرتے ہوئے برطانوی موقف کو دہرایا گیا کہ برطانیہ ان حملوں میں براہِ راست شریک نہیں تھا، تاہم برطانیہ نے دفاعی مقاصد کے تحت امریکا کو اپنے فوجی اڈے استعمال کرنے کی اجازت دی ہے۔رابطے کے دوران آبنائے ہرمز کی بندش اور اس کے نتیجے میں عالمی تجارت اور تیل کی ترسیل کو درپیش خطرات پر بھی گفتگو ہوئی۔ واضح رہے کہ ایران کی جانب سے اس اہم بحری گزرگاہ کی بندش کے بعد برطانیہ اور فرانس اسے دوبارہ کھلوانے کے لیے سفارتی سطح پر متحرک ہیں تاکہ عالمی معیشت پر پڑنے والے منفی اثرات کو کم کیا جا سکے۔