ایران کا خلیجی خطے میں گوگل، مائیکرو سافٹ اور دیگر امریکی ٹیک کمپنیوں ، بینکوں کو نشانہ بنانے کا اعلان

ایران نے اسرائیل اور خلیجی خطے میں امریکی ٹیکنالوجی کمپنیوں اور بینکوں کو نشانہ بنانے کا اعلان کر دیا ہے۔

ایران کی پاسدارانِ انقلاب نے اپنے بیان میں کہا ہے کہ اب اسرائیل اور خلیجی ممالک میں موجود امریکی ٹیکنالوجی کمپنیوں اور مالیاتی اداروں کو ہدف بنایا جائے گا۔

پاسدارانِ انقلاب کے مطابق حالیہ کارروائی میں ایران کے ایک بینک کو نشانہ بنایا گیا تھا جس کے بعد دشمن کی جانب سے معاشی مراکز کو نشانہ بنانے کے باعث ایران کو جوابی اقدامات پر مجبور ہونا پڑا۔

ایرانی فورسز کا کہنا ہے کہ ایسے معاشی اور مالیاتی مراکز کو ہدف بنایا جائے گا جو امریکا یا اسرائیل سے وابستہ ہیں۔

پاسدارانِ انقلاب نے شہریوں کو خبردار کرتے ہوئے کہا ہے کہ وہ ایسے بینکوں اور مالیاتی اداروں سے دور رہیں جو امریکا یا اسرائیل سے تعلق رکھتے ہیں۔

دوسری جانب اسرائیل کی جانب سے ایران کے مختلف شہروں پر حملے جاری ہیں۔ دارالحکومت تہران میں شدید بمباری کی گئی جس کے دوران دھماکوں اور لڑاکا طیاروں کی آوازیں بھی سنی گئیں جبکہ ایک شہری شہید ہو گیا۔

رپورٹس کے مطابق امریکا اور اسرائیل کی جانب سے اصفہان میں بھی بمباری کی گئی جس کے نتیجے میں روسی قونصل خانہ متاثر ہوا جبکہ تبریز میں حملے کے دوران تین شہری شہید اور چار زخمی ہو گئے۔

ایرانی حکام کے مطابق اٹھائیس فروری سے شروع ہونے والے حملوں کے بعد اب تک ایران میں دس ہزار سے زائد شہری مقامات کو نشانہ بنایا جا چکا ہے جبکہ بیس ہزار عمارتیں متاثر ہوئی ہیں۔