ایران کا آبنائے ہرمز پر اب بھی مؤثر کنٹرول قائم ہے: عرب میڈیا

عرب میڈیا کی ایک حالیہ رپورٹ کے مطابق، مشرقِ وسطیٰ کی سب سے اہم آبی گزرگاہ “آبنائے ہرمز” پر ایران اپنا مؤثر اور عملی کنٹرول برقرار رکھے ہوئے ہے۔ عرب ٹی وی کی رپورٹ میں بتایا گیا ہے کہ اس وقت امریکا اور ایران دونوں ہی اس تزویراتی گزرگاہ پر اپنا اثر و رسوخ قائم کرنے کی بھرپور کوشش کر رہے ہیں، تاہم ایران کا یہ سخت مؤقف ہے کہ آبنائے ہرمز سے گزرنے والے ہر بحری جہاز یا کشتی کے لیے ایرانی حکام کے ساتھ رابطہ اور پیشگی ہم آہنگی قائم کرنا لازمی ہے۔ رپورٹ کے مطابق، عملی طور پر ایران اس وقت اس آبی شاہراہ پر غیر معمولی اختیار استعمال کر رہا ہے اور اس کی باضابطہ اجازت یا منظوری کے بغیر بعض جہازوں کو گزرنے نہیں دیا جا رہا۔ اسی کشیدگی کے باعث حالیہ دنوں میں آبنائے ہرمز سے گزرنے یا اس کے قریب پہنچنے کی کوشش کرنے والے متعدد تیل بردار بحری جہازوں کو روکا گیا جبکہ بعض جہازوں پر فائرنگ کے واقعات بھی رپورٹ ہوئے ہیں۔