جنگ کی صورت میں ایران آبنائے ہرمز پر مکمل کنٹرول سنبھالے گا: کاظم غریب آبادی

ایرانی نائب وزیر خارجہ کاظم غریب آبادی نے علاقائی سلامتی اور تزویراتی حالات پر انتہائی اہم بیان جاری کرتے ہوئے کہا ہے کہ کسی بھی جنگ کی صورت میں ایران آبنائے ہرمز کا مکمل انتظام اور کنٹرول اپنے ہاتھ میں لے لے گا۔ انہوں نے واضح کیا کہ آبنائے ہرمز سے متعلق ایران کے یہ اقدامات برادر ملک عمان کی خودمختاری کے خلاف نہیں ہوں گے، تاہم ایران کی اپنی قومی سلامتی کے تحفظ کے لیے اس اہم ترین تجارتی و بحری گزرگاہ پر کنٹرول حاصل کرنا ناگزیر ہے۔ کاظم غریب آبادی نے دوٹوک الفاظ میں کہا کہ ایران اپنی قومی سلامتی کے خلاف آبنائے ہرمز کو کسی صورت استعمال نہیں ہونے دے گا۔ انہوں نے مزید اعلان کیا کہ امریکا کے ساتھ طے شدہ مفاہمتی یادداشت اب بالکل مؤثر نہیں رہی کیونکہ امریکا نے خود اس کی خلاف ورزی کر کے اسے عملاً ختم کر دیا ہے، جس کے بعد اب ایران بھی اس مفاہمتی یادداشت کا پابند نہیں رہا اور ملکی دفاع کے لیے آزادانہ فیصلے کرے گا