ایرانی پاسداران انقلاب نے دو آئل ٹینکر تحویل میں لے لیے

ایران کے پاسدارانِ انقلاب نے خلیج  میں دو آئل ٹینکر قبضے میں لے لیے۔میڈیا رپورٹس کے مطابق دونوں آئل ٹینکرز کو ایندھن کی اسمگلنگ کے الزام میں جزیرے فارسی کے قریب تحویل میں لیاگیا۔ دونوں کا عملہ غیرملکی ہے۔تاہم تاحال یہ واضح نہیں ہو سکا کہ ضبط کیے گئے ٹینکرز پر کون سے ممالک کے پرچم لگے تھے اور عملے کا تعلق کن ملکوں سے ہے۔

ابتدائی رپورٹس کے مطابق دونوں جہازوں سے 10 لاکھ لٹر سے زائد اسمگل شدہ ایندھن برآمد کیا گیا جبکہ مجموعی طور پر عملے کے 15 غیر ملکی ارکان کو عدالتی کارروائی کے لیے حکام کے حوالے کر دیا گیا۔

پاسداران انقلاب کی جانب سے جاری بیان میں  کہا گیا کہ یہ جہاز گزشتہ کئی ماہ سے اسمگلنگ میں ملوث تھے اور نگرانی، انٹیلی جنس معلومات اور سمندری کارروائیوں کے بعد انہیں روکا گیا۔ایران ماضی میں بھی خلیج اور آبنائے ہرمز میں ایسے ٹینکرز کے خلاف کارروائیاں کرتا رہا ہے۔