حملوں کا جواب: ایران نے امریکی فوجی اڈوں پر میزائلوں کی بارش کردی

روسی میڈیا اور ایرانی سرکاری ذرائع ابلاغ نے دعویٰ کیا ہے کہ تہران نے امریکی فورسز کے حالیہ عسکری حملوں کے ردِعمل میں مشرقِ وسطیٰ میں قائم امریکی فوجی اڈوں پر بالسٹک اور کروز میزائلوں کی بارش کر دی ہے۔ رپورٹ کے مطابق ایران کے شہروں اصفہان، تہران، تبریز اور خرم آباد سے درجنوں میزائل داغے گئے، جن کا بنیادی ہدف اردن میں قائم امریکی ملٹری بیس تھی جس پر دو درجن سے زائد میزائل برساۓ گئے۔ ایرانی سرکاری میڈیا کے مطابق اردن کے فوجی اڈے میں شدید دھماکوں کی آوازیں سنی گئی ہیں، جبکہ اردن میں نصب پینٹاگون کا جدید ائیر ڈیفنس سسٹم ایرانی میزائلوں کو فضا میں تباہ کرنے کے لیے فوری فعال کر دیا گیا۔

اس شدید تناؤ سے قبل امریکی سینٹرل کمانڈ (CENTCOM) نے ایک بیان میں اعلان کیا تھا کہ امریکی فورسز نے ایک سیکیورٹی کارروائی کے دوران ایران کے 5 خام تیل بردار بحری جہاز (آئل ٹینکرز) تباہ کر دیے ہیں۔ سینٹ کام کا کہنا تھا کہ یہ اقدام پاسدارانِ انقلاب (IRGC) کی جانب سے گزشتہ دو روز کے دوران امریکی بحری جنگی جہاز کو دو مرتبہ بیلسٹک میزائلوں سے نشانہ بنانے کی کوششوں کا جواب تھا۔ صورتحال کے پیشِ نظر ایرانی بحریہ نے سخت انتباہ جاری کرتے ہوئے کویت اور بحرین کی ان تمام بندرگاہوں اور تیل بردار جہازوں کے عملے کو فوری انخلا کی ہدایت کی ہے جہاں امریکی فوجی اور سیکیورٹی اہلکار موجود ہیں۔