غیر قانونی طور پر حاصل کی گئی پاکستانی شہریت فوری منسوخ کرنے کا حکم؛محسن نقوی

اسلام آباد: وفاقی وزیر داخلہ محسن نقوی نے نیشنل ڈیٹا بیس اینڈ رجسٹریشن اتھارٹی (نادرا) کے ہیڈ کوارٹرز کا دورہ کیا اور ایک اعلیٰ سطح کے اجلاس کی صدارت کی۔ اجلاس کے دوران چیئرمین نادرا لیفٹیننٹ جنرل محمد منیر افسر نے وفاقی وزیر کو ادارے کی کارکردگی، جاری منصوبوں اور مستقبل کی حکمتِ عملی پر تفصیلی بریفنگ دی۔

وزیر داخلہ نے نادرا کی کارکردگی کو سراہتے ہوئے واضح ہدایات جاری کیں کہ غیر قانونی طور پر پاکستانی شہریت حاصل کرنے والے افراد کی فوری شناخت کر کے انہیں نیشنل ڈیٹا بیس سے نکالا جائے۔ انہوں نے نادرا کو ہدایت کی کہ غیر قانونی غیر ملکیوں کے انخلا کے عمل میں قانون نافذ کرنے والے اداروں کو مکمل معاونت فراہم کی جائے۔ محسن نقوی نے بڑے شہروں میں کرائے کی عمارتوں کے بجائے نادرا کی اپنی جگہ پر ‘اسٹیٹ آف دی آرٹ’ دفاتر کے قیام کے لیے ماسٹر پلان بھی طلب کر لیا۔

بریفنگ کے دوران بتایا گیا کہ نادرا نے لاکھوں فوت شدہ افراد کے شناختی کارڈز منسوخ کر دیے ہیں اور پی ٹی اے کے تعاون سے ان کے نام پر جاری موبائل سمز کو بھی بلاک کیا جا رہا ہے۔ مزید برآں، شناختی کارڈ سے متعلق عوامی مسائل کے حل کے لیے 30 دن کی مدت مقرر کر دی گئی ہے۔ وزیر داخلہ نے بائیومیٹرک تصدیق کے لیے چہرے کی تصویر کے نظام کو مزید مؤثر بنانے کے لیے دیگر اداروں کے ساتھ تعاون کی یقین دہانی کرائی۔ اجلاس میں ڈی جی ایف آئی اے ڈاکٹر عثمان انور اور نادرا کے دیگر اعلیٰ حکام بھی موجود تھے۔