عمان کے قریب مشتبہ ڈرون حملہ، بھارتی پرچم بردار کارگو جہاز سمندر میں ڈوب گیا

عمان کے ساحل کے قریب مشتبہ ڈرون حملے کے بعد ایک بھارتی پرچم بردار کارگو جہاز سمندر میں ڈوب گیا، تاہم جہاز میں سوار تمام 14 افراد کو بحفاظت بچا لیا گیا۔

برطانوی میری ٹائم سکیورٹی فرم کے مطابق بھارتی پرچم بردار جہاز “ایم ایس وی حاجی علی” آبنائے ہرمز کے جنوب میں عمانی ساحل کے قریب مشتبہ ڈرون حملے کا نشانہ بنا، جس کے بعد جہاز ڈوب گیا۔

رپورٹس کے مطابق جہاز پر عملے کے 14 ارکان سوار تھے جنہیں عمانی حکام نے فوری کارروائی کرتے ہوئے محفوظ مقام پر منتقل کردیا۔

بھارتی وزارت خارجہ نے واقعے کی تصدیق کرتے ہوئے کہا کہ بدھ کے روز پیش آنے والے حملے کے بعد تمام افراد کو بحفاظت ریسکیو کرلیا گیا۔

بھارتی وزارت خارجہ کے مطابق تجارتی بحری جہازوں کو نشانہ بنانا ناقابل قبول ہے اور بحری نیویگیشن و تجارتی آزادی کو خطرات سے محفوظ رکھا جانا چاہیے۔

میری ٹائم سکیورٹی فرم نے بتایا کہ یہ جہاز حال ہی میں صومالیہ سے روانہ ہوا تھا اور شارجہ جا رہا تھا جبکہ اس میں مویشی لادے گئے تھے۔

ادارے کے مطابق خطے میں بڑھتی کشیدگی کے باعث اب چھوٹے بحری جہاز بھی خطرات کی زد میں آنا شروع ہوگئے ہیں۔