بھارتی جیلوں سے رہائی پانے والے پاکستانی ماہی گیر ایدھی فاؤنڈیشن کے حوالے

بھارتی جیلوں میں طویل عرصے تک قید رہنے والے 12 پاکستانی ماہی گیروں کو سزا پوری ہونے کے بعد رہا کر دیا گیا ہے، جنہیں واہگہ بارڈر پر قانونی کارروائی کے بعد ایدھی فاؤنڈیشن کے حوالے کر دیا گیا۔

ترجمان ایدھی فاؤنڈیشن کے مطابق، بھارتی جیلوں میں 8 سے 9 سال تک کی طویل قید کاٹنے والے ان 12 پاکستانی ماہی گیروں کو پاکستانی رینجرز حکام نے ایدھی فاؤنڈیشن لاہور کے سپرد کیا۔ ان ماہی گیروں کو مبینہ طور پر سمندری حدود کی خلاف ورزی کرنے کے الزام میں گرفتار کر کے مختلف بھارتی جیلوں میں قید کیا گیا تھا۔ ترجمان نے رہائی پانے والے تمام ماہی گیروں کے نام بھی جاری کیے ہیں جن میں محبوب علی، نورالامین، بشیر جاوید، سید غلام مرتضیٰ، کریم، اعظم الدین، نور نبی، امیر حسین بنگالی، کمال حسین شاہ، شریف، احمد نور اور عبدالرحمن شامل ہیں۔

ترجمان ایدھی فاؤنڈیشن نے مزید بتایا کہ چیئرمین ایدھی فاؤنڈیشن فیصل ایدھی کی خصوصی ہدایات پر ان تمام ماہی گیروں کو محفوظ اور آرام دہ سفری گاڑیوں کے ذریعے لاہور سے کراچی روانہ کر دیا گیا ہے۔ اس دوران ایدھی فاؤنڈیشن کی جانب سے ماہی گیروں کو نہ صرف تمام سفری اخراجات اور کھانے پینے کی اشیا فراہم کی گئیں بلکہ دیگر ضروری امدادی سہولیات بھی مہیا کی گئیں تاکہ وہ بحفاظت اپنے آبائی علاقوں اور اہل خانہ تک پہنچ سکیں۔