حکومت نے عمران خان کے بیٹے قاسم خان کی گفتگو کو بلاجواز متنازع بنایا ، سہیل آفریدی 

وزیراعلیٰ خیبر پختونخوا سہیل آفریدی نے کہا ہے کہ عمران خان کے بیٹے کی گفتگو کو وفاقی حکومت نے غیر ضروری طور پر متنازع بنا دیا ہے، حالانکہ یہ ایک بیٹے کے اپنے والد کے لیے فطری جذبات کا اظہار تھا۔

خیبر پختونخوا ہاؤس میں پریس کانفرنس کرتے ہوئے انہوں نے بتایا کہ بانی پی ٹی آئی کے بیٹے کی گفتگو کا اردو ترجمہ بھی کروایا گیا، جس سے واضح ہوتا ہے کہ اس کا سیاست سے کوئی تعلق نہیں بلکہ یہ خالصتاً ایک بیٹے کی اپنے والد کے لیے تشویش تھی۔

ان کا کہنا تھا کہ اس گفتگو کو جی ایس پی پلس کے معاملے سے جوڑنا سراسر غلط بیانی ہے۔ انہوں نے الزام عائد کیا کہ دراصل جی ایس پی پلس معاہدے کی خلاف ورزی خود وفاقی حکومت کر رہی ہے۔

سہیل آفریدی نے کہا کہ اگر ملکی صنعتیں فعال ہوتیں تو تجارتی خسارہ کم ہوتا، مگر وفاقی پالیسیوں کے باعث کسان، طلبہ اور عام شہری مشکلات کا شکار ہیں۔

انہوں نے مزید کہا کہ بانی پی ٹی آئی کی اہلیہ بشریٰ بی بی کی آنکھ میں تکلیف ہے اور ان کے ساتھ ناروا سلوک کیا جا رہا ہے۔

ماحولیاتی امور پر بات کرتے ہوئے انہوں نے کہا کہ درختوں کی کٹائی اور ماحولیاتی تحفظ کے خلاف اقدامات میں بھی وفاقی حکومت ملوث ہے، جبکہ خیبر پختونخوا میں اس حوالے سے بہتر اقدامات کیے جا رہے ہیں۔